Biznesmeni 53-vjeçar Ilir Shtufi do të përballet me organet shqiptare të drejtësisë, pas vendimit të Gjykatës së Apelit të Selanikut për të miratuar kërkesën për ekstradimin e tij. I shpallur në kërkim ndërkombëtar nga Prokuroria e Posaçme (SPAK), Shtufi është një nga emrat kyç në dosjen e bujshme të trafikut ndërkombëtar të lëndëve narkotike dhe pastrimit të produkteve të veprës penale.

Rikthimi i tij në Shqipëri pritet të hedhë dritë mbi mekanizmat financiarë që grupet kriminale kanë përdorur për të injektuar paratë e kokainës në tregun e ndërtimit dhe pasurive të paluajtshme.

Arrestimi në Greqi dhe beteja kundër ekstradimit

Ilir Shtufi u lokalizua dhe u prangos në qershor të këtij viti brenda një hoteli në periferi të Selanikut. Operacioni u krye nga oficerët e Nëndrejtorisë së Krimit të Organizuar të Greqisë Veriore, pas shkëmbimit të informacioneve me INTERPOL-in.

Gjatë përballjes me trupin gjykues grek, 53-vjeçari zgjodhi të kundërshtonte ekstradimin, duke ngritur pretendime për mungesë të sigurisë juridike dhe fizike në vendin e tij.

“I pandehuri i mohoi akuzat, duke pretenduar se po persekutohej politikisht nga regjimi i Edi Ramës për shkak të aktiviteteve të tij në biznes dhe vuri në dyshim paanshmërinë e gjyqësorit shqiptar.”, shkruan gazeta greke The Gr Times.

Pavarësisht këtyre pretendimeve, Gjykata e Apelit e Selanikut vlerësoi të ligjshëm dhe të bazuar në prova urdhër-arrestin ndërkombëtar, duke vendosur pro dorëzimit të tij te autoritetet shqiptare.

Pesha e akuzave, roli i Shtufit në dosjen 287/1 të SPAK

Hetimi i SPAK (procedimi penal nr. 287/1 i vitit 2021) zbuloi një rrjet të mirëfilltë ndërkombëtar që merrej me trafikun e kokainës nga Amerika Latine drejt porteve të Belgjikës, Spanjës dhe Holandës. Ndërsa eksponentë të tjerë të grupit drejtonin logjistikën e drogës, Ilir Shtufi dhe disa biznesmenë të tjerë dyshohen se kishin rolin thelbësor të qarkullimit dhe pastrimit të fitimeve marramendëse.

Sipas dosjes hetimore, e cila mbështetet në zbërthimin e komunikimeve nga platforma SKY ECC dhe në analizat e thelluara financiare, Shtufi akuzohet për:

Pjesëmarrje në grup të strukturuar kriminal.

Pastrim të produkteve të veprës penale.

Kryerjen e veprave penale nga organizata kriminale.

Mekanizmi i pastrimit dhe asetet e sekuestruara

Skema ku dyshohet se është përfshirë Shtufi konsistonte në fshehjen e origjinës së fondeve përmes personave të tretë dhe kompanive tregtare, duke i investuar ato në prona luksoze dhe projekte zhvillimi në zonat më të lakmuara të vendit.

Ndonëse vlera e saktë e pasurive që lidhen drejtpërdrejt me Shtufin është ende në proces verifikimi individual, organizata ku ai bën pjesë ka pësuar një nga goditjet më të mëdha financiare në historinë e drejtësisë shqiptare. Me kërkesë të SPAK, Gjykata e Posaçme ka sekuestruar:

Pasuri dhe kontrata shitblerjeje me vlerë totale mbi 128.4 milionë euro.

Dhjetëra vila në komplekset Green Coast (Palasë), Rolling Hills (Tiranë), si dhe prona në Jalë e Himarë.

Kompani ndërtimi, hotele në Vlorë dhe mbi 330 llogari bankare të dyshimta.

Përfshirja e Shtufit në këtë megaproces pritet të thellojë hetimet, të cilat po zhvillohen në bashkëpunim të ngushtë me Europol, Eurojust dhe autoritetet e gjashtë shteteve evropiane, për të zbardhur plotësisht zinxhirin e pastrimit të parave në Shqipëri.

/rtsh.al/