Policia e Shkodrës ka finalizuar operacionin e koduar “Shëtitësi”, i cili kishte për qëllim parandalimin e vjedhjeve dhe zbardhjen e rasteve të ndodhura më parë në qytet.

Sipas njoftimit zyrtar, shërbimet e Komisariatit të Policisë Shkodër, pas denoncimeve të marra nga qytetarët, organizuan punën hetimore dhe operacionale për identifikimin e autorit të dyshuar.

Si rezultat, u kap në flagrancë, në tentativë për të vjedhur një tjetër biçikletë, shtetasi:F. A., 56 vjeç, banues në Durrës.

Hetimet paraprake tregojnë se ky shtetas dyshohet se ka kryer disa vjedhje në qytetin e Shkodrës, përfshirë një shumë parash në një automjet taksi dhe 2 biçikleta në zona të ndryshme.

Arrestimi i tij u bë në lagjen “Liria”, teksa tentonte të vidhte një tjetër biçikletë.
Materialet procedurale i janë referuar Prokurorisë së Shkodrës për veprime të mëtejshme ligjore.

/rtsh.al/