Udhëheqësi demokrat Hakeem Jeffries ka vendosur një rekord të ri për fjalimin më të gjatë në historinë moderne të Dhomës së Përfaqësuesve të SHBA, duke folur pa ndërprerë në shenjë proteste kundër projektligjit gjithëpërfshirës të politikës së brendshme të Presidentit Donald Trump.

Fjalimi maratonë i Jeffries, i cili filloi në orën 4:53 të mëngjesit ET, kaloi rekordin e mëparshëm të vendosur nga Kevin McCarthy në vitin 2021.

Demokrati nga Nju Jorku foli për orë të tëra nga dy dosje të ndryshme, duke ndarë histori nga amerikanët e prekur nga shkurtimet e propozuara në programin Medicaid dhe dispozita të tjera të mega-projektligjit të Partisë Republikane.

Ai mbajti një ritëm të ngadaltë, duke bërë pauza të gjata mes fjalëve dhe frazave për të theksuar mesazhin e tij.

Jeffries përdori mjetin legjislativ të njohur si “minuta magjike”, i cili u jep udhëheqësve të partive në Dhomë mundësinë të flasin për aq kohë sa dëshirojnë në sallën e seancave.

Rekordi i mëparshëm i takonte ish-udhëheqësit të pakicës në Dhomën e Përfaqësuesve, Kevin McCarthy, i cili në nëntor 2021 foli për 8 orë e 32 minuta. Ai e bëri këtë për të vonuar një votim mbi planin e atëhershëm të Presidentit, Joe Biden për të zgjeruar rrjetin e sigurimeve shoqërore. Në atë kohë, Donald Trump kishte lëshuar një deklaratë duke lavdëruar McCarthy-n për fjalimin e tij.

Ky lloj fjalimi i gjatë në Dhomën e Përfaqësuesve shërben si një taktikë për të tërhequr vëmendjen mbi një çështje dhe për të vonuar proceset legjislative, duke nxjerrë në pah ndarjet e thella politike rreth politikave kyçe kombëtare.

/rtsh.al/