I pranishëm në homazhet për 24-vjetorin e vrasjes së Azem Hajdarit, kreu i Partisë së Lirisë, Ilir Meta, ka bërë thirrje për protesta. Sipas Metës, protestat janë e vetmja mënyrë për rivendosjen e demokracisë.

“Guximtar i jashtëzakonshëm, lidership frymëzues që tregoi në kohët më të errëta duke frymëzuar shpresë në përmbysjen e regjimit falë protestës së studentëve dhe qytetarëve shqiptarë. Ky homazh ka rëndësi më të madhe sot sepse si asnjëherë tjetër në këto 32 vite janë vënë në diskutim arritjet më të mëdha të demokracisë, por edhe ekzistenca e kombit tonë. Kjo dallohet edhe nga numri më i ulët i nxënësve këtë vit. Degradim i vlerave të demokracisë, kërcënim i shtetit tonë. Shpirti i protestave do të rivendosë demokracinë që sistemi i vlerave dhe llogaridhënies të vazhdojë për 200 vitet e ardhshme”, u shpreh Meta.

Të njëjtën thirrje për qytetarët pati edhe kreu i Partisë Demokratike, i zgjedhur nga Komisioni i Rithemelimit, Sali Berisha. Opozita ka paralajmëruar për protesta të fuqishme në shtator, kundër qeverisë së kryeministrit Edi Rama.

/rtsh.al/