Policia e Vlorës ka vënë në pranga autorin e dyshuar për shkatërrimin me eksploziv të një lokali në lagjen “Uji i Ftohtë”.

Nga hetimet e kryera nga blutë e qytetit bregdetar, rezultoi se 28-vjeçari Beqir S. alias Beqir M. është autori për shkatërrimin me eksploziv të datës 8 dhjetor të një lokali në Vlorë.

Gjatë operacionit, u sekuestruan në cilësinë e provave materiale dy telefona celular, një biçikletë dhe veshjet e përdorura gjatë ngjarjes.

Vijojnë hetimet për identifikimin dhe ndalimin e personave të tjerë të përfshirë në këtë veprimtari kriminale.

“Bazuar në veprimet intensive hetimore dhe dokumentimin me prova ligjore, u bë i mundur ndalimi i shtetasit B. S. alias B. M, 28 vjeç, banues në lagjen “Isa Boletini” dhe me precedentë penalë në fushën e narkotikëve dhe vjedhjes së pasurisë.

Nga hetimet rezulton se ky shtetas dyshohet të jetë autor i vendosjes së lëndës eksplozive më datë 08.12.2024, rreth orës 05:50, në një lokal, në lagjen “Uji i Ftohtë”, në pronësi të shtetases R. B., 73 vjeçe, ku si pasojë e shpërthimit janë shkaktuar dëme të konsiderueshme materiale”, thuhet në njoftim.

/rtsh.al/