Vijon të jetë i lartë interesi i të rinjve për të studiuar në programin e përbashkët të ciklit të parë “Bachelor” në “Inxhinieri Informatike”, i ofruar nga Universiteti “Fan Noli” në bashkëpunim me Universitetin Politeknik të Tiranës.

Ky program, me diplomë të dyfishtë, u jep studentëve mundësinë të përfitojnë njohuri në fushën e teknologjisë së informacionit, si dhe të kenë më shumë mundësi punësimi në tregun vendas dhe ndërkombëtar.

“Shumë e rëndësishme për të gjithë qarkun e Korçës, sepse angazhimi i të gjithë studentëve këtu bën që, që nga diploma e parë, ata të mund të vazhdojnë me diplomë master shkencor dhe profesional dhe janë të mirëpritur”, tha Prof. As. Dr. Algenti Lala, Pedagog, Universiteti Politeknik i Tiranës.

Studentët shprehen se ky bashkëpunim mes dy universiteteve është një mundësi e mirë për zhvillimin profesional dhe për ndjekjen e karrierës në fushën e inxhinierisë informatike.

Programi synon të përgatisë specialistë të kualifikuar, duke krijuar mundësi për vijimin e studimeve në ciklin e dytë dhe integrimin në tregun e punës.

Gazetare: E. Fili   

/rtsh.al/