Izraeli ka nisur një operacion të madh ushtarak në zona të shumta të Bregut Perëndimor, teksa autoritetet palestineze shëndetësore thanë se të paktën nëntë persona janë vrarë.

Ushtria izraelite konfirmoi se kishte nisur një operacion të madh “kundër terrorizmit” gjatë natës në zonat e Jenin dhe Tulkarem në Bregun Perëndimor.

“Forcat e Mbrojtjes së Izraelit kanë operuar që nga sonte me forcë të madhe në kampet e refugjatëve të Jenin dhe Tul Karm për të penguar infrastrukturat terroriste islamike-iraniane të instaluara atje,” tha Ministri i Jashtëm izraelit Israel Katz.

Sipas Shoqatës së Gjysmëhënës së Kuqe Palestineze (PRCS) janë raportuar vdekje palestineze në qytetet Tubas dhe Jenin. Të paktën dy nga të vrarët në Jenin ishin si rezultat i zjarrit ushtarak izraelit dhe tre të tjerë u vranë në një sulm me dron në një automjet në periferi të Jeninit, sipas PRCS.

Ministria palestineze e Shëndetësisë tha se forcat izraelite kishin bllokuar rrugët që të çojnë në spitalin qeveritar në Jenin dhe e kishin rrethuar atë.

“Dhjetëra pacientë aktualisht po trajtohen në spitalet qeveritare, private dhe bamirëse në Jenin dhe se çdo pushtim i tyre është një kërcënim i drejtpërdrejtë për jetën e tyre dhe jetën e personelit mjekësor”, tha ministria e shëndetësisë.

Ndërkohë, Hamasi bëri thirrje për një “mobilizim të përgjithshëm kundër okupimit dhe kolonëve të tij kudo në tokën tonë të pushtuar”. Grupi tha se operacioni izraelit ishte “i gjerë” dhe akuzoi ushtrinë izraelite për “shkatërrim të qëllimshëm të infrastrukturës duke përdorur forca të mëdha ushtarake të shoqëruara me bombardime ajrore nga dronët dhe avionët luftarakë”.

Izraeli e ka pushtuar Bregun Perëndimor që kur pushtoi territorin në vitin 1967. Gjatë dekadave që nga ajo kohë, Izraeli ka  zgjeruar vendbanimet hebraike  në Bregun Perëndimor, të konsideruara të paligjshme sipas ligjit ndërkombëtar, pavarësisht nënshkrimit të një sërë marrëveshjesh paqeje me palestinezët në vitet 1990.

Lufta aktuale e Izraelit kundër Hamasit në Gaza, e cila filloi pas sulmeve të 7 tetorit,  është përhapur gjithnjë e më shumë  në Bregun Perëndimor me sulmet ushtarake izraelite, sulmet e kolonëve dhe përleshjet duke vrarë qindra palestinezë./BBC

/rtsh.al/