Komisioni i Ankimimeve dhe Sanksioneve (KAS) pranë Komisionit Qendror të Zgjedhjeve (KQZ) po shqyrton sot, më 7 korrik 2025, katër kërkesa ankimore të rëndësishme depozituar nga Koalicioni Partia Demokratike – Aleanca për Shqipërinë Madhështore (PD-ASHM).

Këto ankimime kanë në qendër kundërshtimin e rezultateve të votimit dhe kërkesën për pavlefshmëri të zgjedhjeve të zhvilluara më 11 maj 2025 në disa prej qarqeve kyçe të vendit.

Objekt i Ankimimeve qarqet Elbasan, Tiranë, Fier dhe Durrës

Rendi i ditës i KAS përfshin shqyrtimin e katër dosjeve ankimore, të cilat ndjekin një model të ngjashëm në kërkesat e tyre:

1.   Qarku Elbasan- Ankimi me numër 56, depozituar më 29 maj 2025, kundërshton vendimin nr. 1328 të KSHZ-së për miratimin e tabelës përmbledhëse të rezultatit të votimit në Elbasan. Kërkesa thelbësore e koalicionit është pavlefshmëria e zgjedhjeve në këtë qark dhe urdhërimi i përsëritjes së tyre.

2.   Qarku Tiranë- Me ankimin nr. 48, depozituar gjithashtu më 29 maj 2025, PD-ASHM kundërshton vendimin nr. 1326 të KSHZ-së për miratimin e rezultateve në Qarkun Tiranë. Si në rastin e Elbasanit, kërkohet pavlefshmëria e zgjedhjeve të 11 majit në Tiranë dhe organizimi i zgjedhjeve të reja.

3.   Qarku Fier- Kërkesa ankimore nr. 47 synon të kundërshtojë vendimin nr. 1317 të KSHZ-së, datë 23 maj 2025, që lidhet me miratimin e rezultateve të votimit në Qarkun Fier. Edhe këtu, kërkesa kryesore është shpallja e pavlefshmërisë së zgjedhjeve të zhvilluara më 11 maj dhe përsëritja e tyre në të gjithë zonën zgjedhore të Fierit.

4.   Qarku Durrës- Ankimi i fundit, me numër 45, depozituar gjithashtu nga koalicioni opozitar, konteston vendimin nr. 1327 të KSHZ-së për miratimin e tabelës përmbledhëse të rezultatit të votimit në Qarkun Durrës. Koalicioni kërkon pavlefshmërinë e zgjedhjeve të 11 majit dhe urdhërimin për përsëritjen e tyre në këtë qark.

Pritshmëritë dhe rëndësia e vendimeve

Këto seanca të KAS janë thelbësore për mbarëvajtjen e procesit zgjedhor dhe legjitimitetin e rezultateve të 11 majit 2025. Vendimet e KAS do të kenë ndikim të drejtpërdrejtë në konfigurimin e Kuvendit të Shqipërisë dhe do të shërbejnë si një tregues i besueshmërisë së institucioneve zgjedhore. Pritet një debat i fortë juridik mes palëve, ndërsa vëmendja e opinionit publik dhe aktorëve politikë është e përqendruar te vendimet që do të merren sot nga ky komision.

KAS ende nuk ka dhënë detaje mbi afatet kohore për marrjen e vendimeve përfundimtare për këto ankimime.

/rtsh.al/