Dy shërbime të rëndësishme shëndetësore tashmë ofrohen brenda institucionit të Shtëpisë së të Moshuarve në Shkodër. 65 të moshuarit që trajtohen në këtë institucion marrin pranë ambienteve të tyre shërbimin dentar dhe atë të fizioterapisë, duke shmangur kështu lëvizjet jashtë institucionit.

Të moshuarit e vlerësojnë këtë përmirësim, duke theksuar se kushtet dhe kujdesi ndaj tyre janë përmirësuar ndjeshëm vitet e fundit.

Krahas investimeve nga institucionet qendrore dhe vendore, në përmirësimin e kushteve në struktura të tilla kontribuojnë edhe individë dhe biznese. Një shembull konkret është ngritja e klinikës dentare brenda institucionit, falë mbështetjes private.

E pranishme në inaugurimin e shërbimeve të reja, drejtoresha e Shërbimit Social Shtetëror theksoi rëndësinë e bashkëpunimit mes të gjitha hallkave për të garantuar standarde sa më të larta kujdesi për të moshuarit.

Shtimi i këtyre shërbimeve përbën një hap të rëndësishëm drejt përmirësimit të cilësisë së jetës për të moshuarit, duke u ofruar atyre jo vetëm trajtim shëndetësor më të lehtë dhe të aksesueshëm, por edhe më shumë dinjitet dhe siguri në përditshmërinë e tyre.

Gazetar: A. Hoti    

/rtsh.al/