Kolegji Zgjedhor Gjyqësor i ka dhënë fund betejës ligjore të kandidatit për deputet, Aulon Kalaja, dhe Partisë Lëvizja e Legalitetit, duke vendosur të pushojë gjykimin e çështjes. Vendimi i marrë sot me shumicë votash, hodhi poshtë kërkesën për rinumërimin e të gjitha kutive të votimit në Qarkun Durrës.

Kërkesëpadia, e cila kishte si objekt ndryshimin e rezultateve zgjedhore dhe shpalljen e pavlefshme të tyre në zonën e Durrësit, u rrëzua nga trupi gjykues me arsyetimin e “mungesës së legjitimitetit të paditësve”. Kjo do të thotë se gjykata vlerësoi se Kalaja dhe partia e tij nuk kishin të drejtën ligjore për ta ngritur këtë çështje.

Vendimi i Kolegjit Zgjedhor, me numër 23, është i formës së prerë dhe ndaj tij nuk lejohet ankim, duke i dhënë kështu një epilog përfundimtar kërkesës së kandidatit për deputet për rinumërim.

/rtsh.al/