Komanda Qendrore e Shteteve të Bashkuara (CENTCOM) ka reaguar ndaj raportimeve të mediave shtetërore iraniane, duke i cilësuar si “pretendime të rreme” deklaratat e Gardës Revolucionare të Iranit.

Në një njoftim të publikuar në platformën X, CENTCOM theksoi se këto rrëfime nuk përputhen me realitetin në terren.

Sipas deklaratës, Irani ka pretenduar se rrugët detare përmes Ngushticës së Hormuzit përbëjnë rrezik për anijet tregtare.

CENTCOM u kundërpërgjigj duke thënë se rreziku i vërtetë janë “kërcënimet verbale të Gardës Revolucionare dhe përpjekjet e saj për të kryer sulme”.

Një tjetër pretendim i mohuar ishte ai për shkatërrimin e avionëve amerikanë. Garda Revolucionare raportoi se kishte goditur tre avionë luftarakë F-35 dhe tre avionë të tjerë gjatë një sulmi të fundit.

Komanda amerikane e hodhi poshtë këtë, duke sqaruar se “asnjë avion amerikan nuk u shkatërrua ose u dëmtua” dhe se raketat e dronët iranianë “u kapën ose nuk arritën objektivat e tyre”.

Po ashtu, media iraniane raportoi se cisterna komerciale e naftës M/T Nora kishte thyer embargon amerikane.

CENTCOM e mohoi këtë, duke theksuar se anija “nuk e shkeli bllokadën” dhe se mbi 20 anije luftarake amerikane, qindra avionë dhe mijëra personel mbeten në gatishmëri për të zbatuar masat e vendosura.

“Forcat tona do të vazhdojnë të monitorojnë situatën dhe të zbatojnë masa që synojnë mbrojtjen e lundrimit dhe interesave të SHBA-së,” thuhet në komunikatën e Komandës Qendrore.

Raundi i fundit i përshkallëzimit mes SHBA-së dhe Iranit nisi më 8 korrik, kur forcat amerikane ndërmorën sulme në territor iranian pas një incidenti në Ngushticën e Hormuzit.

Po atë ditë, Presidenti amerikan Donald Trump shpalli përfundimin e armëpushimit me Iranin. Në kundërpërgjigje, Teherani shënjestroi bazat amerikane në Bahrein, Jordani, Katar, Kuvajt, Emiratet e Bashkuara Arabe dhe Oman. Më 29 korrik, Trump njoftoi se Shtetet e Bashkuara do të vazhdojnë sulmet kundër Iranit.

Over the past few hours, Iranian state media have continued to report false claims by the Islamic Revolutionary Guard Corps (IRGC) – three in particular.

🚫 FIRST CLAIM: The IRGC (again) claims free and open routes through the Strait of Hormuz are dangerous for commercial… pic.twitter.com/J34ILmDvyk

— U.S. Central Command (@CENTCOM) July 30, 2026

/rtsh.al/