Seuli njoftoi të dielën se Koreja e Veriut ka lëshuar dy raketa balistike me rreze të shkurtër drejt detit, vetëm pak ditë pasi Pheniani paralajmëroi se do të forcojë kapacitetet e tij bërthamore dhe do të përgjigjet ndaj asaj që e cilëson si armiqësi amerikane.

Sipas ushtrisë së Koresë së Jugut, lëshimet u kryen nga zona bregdetare lindore e Wonsanit, me një interval prej tre orësh.

Raketa e parë përshkoi rreth 450 kilometra, ndërsa e dyta mbi 600 kilometra, të dyja duke rënë në ujërat lindorë të Koresë së Veriut. Zyra presidenciale e Seulit i bëri thirrje Phenianit të ndalojë menjëherë testet e tilla, të ndaluara nga rezolutat e Këshillit të Sigurimit të OKB-së, ndërsa ushtria jugkoreane theksoi gatishmërinë për t’u përgjigjur ndaj çdo provokimi në kuadër të aleancës së fortë me Shtetet e Bashkuara.

Ministria e Mbrojtjes së Japonisë raportoi se kishte zbuluar një raketë të dyshuar koreano-veriore, por se ajo nuk kishte hyrë në ujërat territoriale japoneze.

Tensionet u shtuan pasi Kim Yo Jong, motra e liderit Kim Jong Un dhe zyrtare e lartë, hodhi poshtë përpjekjen e Presidentit Trump për të zbutur stërvitjen e përbashkët ushtarake me Seulin, duke e cilësuar si provokim.

Menjëherë pas kësaj, ushtria e Koresë së Veriut lëshoi rreth 10 raketa balistike me rreze të shkurtër drejt detit, duke ndjekur paralajmërimet e mëparshme për përgjigje ndaj manovrave ushtarake.

Kim Yo Jong kritikoi gjithashtu stërvitjen shumëpalëshe “Pacific Vanguard”, të udhëhequr nga SHBA me pjesëmarrjen e Koresë së Jugut, Japonisë, Australisë, Zelandës së Re dhe Kanadasë, duke e cilësuar si “lëvizje të çmendura ushtarake” për ruajtjen e hegjemonisë amerikane në rajonin e Azi-Paqësorit.

Ajo deklaroi se “vullneti për të mbrojtur sovranitetin tonë do të shprehet me veprime më të qarta dhe kursi i intensifikimit të parandalimit bërthamor nuk do të ndryshojë kurrë.”

Pheniani ka intensifikuar zhvillimin e arsenalit bërthamor pas dështimit të diplomacisë së nivelit të lartë me Trump në vitin 2019. Presidenti amerikan urdhëroi Pentagonin të reduktojë ndjeshëm stërvitjen vjetore “Ulchi Freedom Shield”, duke përmendur marrëdhënien e mirë me Kim, i cili i konsideron këto manovra si prova pushtimi.

Ekspertët vlerësojnë se Kim, i mbështetur nga përparimi bërthamor dhe lidhjet e thelluara me Rusinë e Kinën, mendon se ka më shumë levë për të rifilluar diplomacinë me Trump. Ai ka deklaruar se mund të rikthehet në bisedime nëse SHBA heq “politikën armiqësore” dhe pranon statusin e Koresë së Veriut si shtet bërthamor.

Presidenti i Koresë së Jugut, Lee Jae Myung, një liberal që mbështet përmirësimin e marrëdhënieve me Veriun, tha të premten se rifillimi i bisedimeve SHBA-Koreja e Veriut do të ishte “një pikënisje e rëndësishme” për paqen në Gadishullin Korean. “Është e qartë se Presidenti Trump dëshiron dialog dhe unë gjithashtu e kam inkurajuar Presidentin Trump të kërkojë dialog me Kim,” u shpreh Lee.

/rtsh.al/