Yuri Ushakov, këshilltar i presidentit rus Vladimir Putin, deklaroi se Moska po vazhdon kontaktet me zyrtarët amerikanë edhe pse ka një pauzë në bisedimet trilaterale.

Sipas tij, aktualisht ka një ndërprerje në negociatat që përfshijnë Rusinë, SHBA-në dhe Ukrainën, por Rusia mbetet në komunikim me Uashingtonin për çështje të lidhura me Ukrainën.

Ushakov shtoi se negociatorët amerikanë janë të fokusuar në çështje të tjera, pa dhënë detaje të mëtejshme, ndërsa Ukraina po zhvillon bisedimet e veta me përfaqësuesit amerikanë.

Deklarata e tij nuk ka marrë ende konfirmim të menjëhershëm nga zyrtarët amerikanë apo ukrainas.

Kjo pauzë vjen në një moment kur bisedimet e udhëhequra nga SHBA-ja me Rusinë kanë ngecur, teksa Washingtoni po i kushton vëmendje më të madhe luftës së tij me Iranin.

Presidenti ukrainas Volodymyr Zelensky ka refuzuar më parë një propozim amerikan që, sipas tij, do të kërkonte nga Ukraina të heqë dorë nga kontrolli mbi pjesë të Donbasit në këmbim të garancive të sigurisë.

Të martën, Zelensky tha se Rusia i ka dhënë Ukrainës një ultimatum dy-mujor për të tërhequr forcat nga Donbasi, ose do të përballet me kushte më të ashpra paqeje.

Ai e quajti propozimin jorealist dhe shprehu habi se si dikush mund ta besojë një gjë të tillë pas kaq shumë vitesh.

Zelensky theksoi gjithashtu se deklaratat e Rusisë bien në kundërshtim me pretendimin se qëllimet e saj janë të kufizuara vetëm në Donbas.

/rtsh.al/