Dom Kreshnik Ivani, teolog, ka ngritur alarmin mbi krizën e thellë që po përjeton familja shqiptare dhe sfidat e shëndetit mendor në shoqëri. I ftuar në emisionin “Një Shqipëri” me Mentor Nazarkon, ku u diskutua lidhja e të rinjve me fenë, Ivani theksoi nevojën urgjente për një rikthim të të rinjve “tek e brendshmja”.

Sipas Dom Ivanit, jo vetëm familja, por edhe rinia dhe shoqëria në përgjithësi janë në krizë. Ai lidhi këtë krizë me ndikimin e teknologjisë dhe mungesën e komunikimit të drejtpërdrejtë.

“Nëse jam gjithë kohës në telefon, nuk dëgjoj as nënën kur më thërret,” tha ai, duke theksuar se “e vërteta nuk mund të gjendet në telefon, por vetëm duke folur.”

Kjo thirrje për t’u shkëputur nga varësia ndaj ekraneve dhe për t’u rikthyer tek ndërveprimi njerëzor është thelbësore për të rindërtuar lidhjet e humbura.

Dom Kreshnik Ivani shprehu shqetësimin e madh për gjendjen e shëndetit mendor në Shqipëri, veçanërisht pas ngjarjeve si tërmeti dhe pandemia, të cilat kanë lënë pasoja të rënda.

“Sot njerëzit po përballen me probleme serioze të shëndetit mendor,” vuri në dukje ai.

Ai bëri një thirrje të fortë për shtetin shqiptar që të hartojë një “plan kombëtar për mbështetjen e shëndetit mendor”. Sipas tij, një iniciativë e tillë do të ishte “një hap shumë i rëndësishëm” dhe duhet të shtrihet në të gjithë vendin. Ivani theksoi se ankthi, stresi, dhe madje edhe aktet e dhunshme si vrasjet, janë realitete aktuale që kërkojnë ndërhyrje urgjente dhe gjithëpërfshirëse.

Mesazhi i Dom Kreshnik Ivanit është një dëshmi e rëndësisë së adresimit të problemeve sociale dhe shpirtërore me një qasje të integruar, që përfshin si veprimin individual ashtu edhe atë institucional.

/rtsh.al/