Porti i Vlorës ka pritur mëngjesin e kësaj të hënën anijen kroçere ‘SILVER WHISPER’ e cila mbërriti me 383 pasagjerë me kombësi të ndryshme si Amerika, Britania e Madhe, Australia, Kanadaja.

Anija kroçere është nisur nga porti i Barit-Itali dhe do të qëndrojë në portin e Vlorës deri në orën 23:00 dhe më pas do të ketë destinacion portin e Galipolit – Itali.

Pasagjerët e anijes do të kenë mundësinë të vizitojnë disa prej pikave turistike më të njohura të Vlorës.

Çdo vit vjen duke u shtuar numri i kroçerave që vizitojnë portin e Vlorës. Fluksi i vizitorëve me kroçera lidhet me plazhet e kristalta të detit Jon dhe trashëgiminë e pasur kulturore të Shqipërisë.

Anija kroçera ‘Silver Whisper’ është një nga dy anijet e klasit Millennium të linjës së lundrimit luksoze Silversea.

Ajo u vu në punë në vitin 2001 dhe iu nënshtrua një rinovimi të thellë në vitin 2018, duke u kthyer në një anije elegante dhe moderne.

/rtsh.al/