Ministri i Jashtëm rus, Sergei Lavrov, e përshkruan aktivitetin e NATO-s në Arktik si një “kërcënim të drejtpërdrejtë” për sigurinë e Rusisë. Qëndrimi i zyrtarit rus vjen në një kohë kur anëtarët e Aleancës po rrisin praninë e tyre në rajon, pas luftës së Rusisë kundër Ukrainës.

Në shkurt, NATO nisi një mision të quajtur “Arctic Sentry” për të forcuar praninë e saj në Veriun e Largët, duke nënvizuar fokusin në rritje të Aleancës në Arktik, mes tensioneve me Rusinë dhe interesimit të Presidentit të SHBA-së, Donald Trump, për Grenlandën.

Rusia, e cila ka një flotë detare që përfshin nëndetëse me energji bërthamore në Arktik, e sheh rajonin si një sferë interesi. Moska po zhvillon gjithashtu një rrugë detare për ta lidhur atë me shtetet aziatike.

Moska më parë kishte shprehur protestën e saj ndaj misionit “Arctic Sentry”. Në artikull, Lavrov, ministri i Jashtëm prej shumë kohësh i Presidentit Vladimir Putin, tha se Rusia i sheh stërvitjet ushtarake të NATO-s në rajon si “agresive”.

“Një aktivitet i tillë ushtarak në Veriun e Largët përbën një kërcënim të drejtpërdrejtë për sigurinë e Rusisë. Rreziku i incidenteve që mund të shkaktojnë një konflikt të armatosur, me pasoja potencialisht katastrofike, është duke u rritur”, tha ai në artikullin e botuar nga Ministria e Jashtme ruse.

Rusia ka praninë më të madhe ushtarake dhe infrastrukturën ushtarake më të gjerë në Arktik, ndërsa vitet e fundit Kina ka filluar të intensifikojë aktivitetin e saj në rajonin e pasur me minerale, kryesisht në bashkëpunim me Moskën.

Fqinji i Rusisë, Norvegjia, këtë muaj përforcoi një brigadë ushtarake të sapoformuar me bazë në Arktik, në lëvizjen e fundit nga një vend i NATO-s për të rritur kapacitetet e saj mbrojtëse pas luftës në Ukrainë, të cilën Rusia e nisi në vitin 2022.

/rtsh.al/