Ministri i Jashtëm i Iranit, Abbas Araghchi, ka nisur një udhëtim diplomatik që përfshin vizita në Islamabad, Muscat dhe Moskë, sipas mediave shtetërore iraniane.

Agjencia IRNA raportoi se qëllimi i vizitës është zhvillimi i konsultimeve dypalëshe dhe diskutimi mbi zhvillimet aktuale në rajon, si dhe situata e krijuar nga lufta e imponuar nga Shtetet e Bashkuara dhe Izraeli kundër Iranit. 

Burime pakistaneze kanë bërë të ditur se bisedimet e paqes midis Iranit dhe SHBA-së mund të rifillojnë së shpejti në Pakistan, ku Araghchi pritej të mbërrinte të premten në mbrëmje.

Dy burime nga qeveria pakistaneze thanë se një ekip amerikan i logjistikës dhe sigurisë ndodhet tashmë në vend për përgatitjen e takimeve të mundshme.

Nuk ka pasur reagim të menjëhershëm nga Uashingtoni apo Teherani, por Sekretari i Mbrojtjes i SHBA-së, Pete Hegseth, deklaroi se Irani ka një mundësi për të arritur një “marrëveshje të mirë” me Shtetet e Bashkuara. 

Raundi i fundit i bisedimeve ishte planifikuar të mbahej të martën, por nuk u zhvillua, pasi Irani tha se nuk ishte ende gati të angazhohej, ndërsa delegacioni amerikan i udhëhequr nga zëvendëspresidenti JD Vance nuk u nis nga Uashingtoni.

Presidenti Donald Trump vendosi të zgjasë në mënyrë të njëanshme një armëpushim dyjavor për të dhënë më shumë kohë për negociata. 

Në një zhvillim paralel, Izraeli dhe Libani ranë dakord të zgjasin një armëpushim të veçantë për tre javë, në një takim të ndërmjetësuar nga Trump në Shtëpinë e Bardhë.

Irani e konsideron ruajtjen e këtij armëpushimi si parakusht për bisedime me SHBA-në mbi konfliktin më të gjerë.

Trump ka theksuar se nuk ka nxitim për një marrëveshje, duke kërkuar që ajo të jetë e përhershme, ndërsa ka pohuar se SHBA-të kanë avantazh në bllokimin e Ngushticës së Hormuzit. 

Ngushtica mbetet e mbyllur nga Irani, i cili ka sekuestruar dy anije të mëdha mallrash këtë javë dhe ka lejuar kalimin vetëm të pak anijeve, krahasuar me rreth 130 që kalonin çdo ditë para luftës.

Vetëm pesë anije kaluan ngushticën në 24 orët e fundit, përfshirë një tanker iranian me produkte nafte. SHBA-të kanë vendosur një bllokadë të veçantë ndaj anijeve iraniane, duke ndërhyrë në disa prej tyre në ujërat ndërkombëtare, ndërsa Irani ka deklaruar se nuk do ta rihapë ngushticën pa heqjen e bllokadës. 

Kjo situatë ka krijuar tensione të mëdha në tregjet globale të energjisë, ndërsa kompanitë e transportit, si Hapag-Lloyd, raportojnë vështirësi të mëdha në lëvizjen e mallrave përmes rajonit.

/rtsh.al/