Japonia dhe Australia, të dy aleatë kyç të Shteteve të Bashkuara, kanë nënshkruar një marrëveshje prej 6.5 miliardë dollarësh për blerjen e 11 anijeve luftarake të avancuara të klasit Mogami. Kjo marrëveshje sinjalizon një forcim të ndjeshëm të aftësive detare të Australisë dhe shënon një hap të rëndësishëm për Japoninë si eksportuese e armëve moderne. Analistët besojnë se ky veprim do të ketë një ndikim të madh në ekuilibrat e fuqisë në Paqësor.

Detajet e fregatave japoneze

Fregatat e klasit Mogami, të prodhuara nga Mitsubishi Heavy Industries, janë anije luftarake sipërfaqësore me teknologji të lartë, që vlerësohen nga analistët si superiore ndaj atyre kineze.

Anijet do të pajisen me 32 qeliza lëshimi vertikal Mk 41, të afta për të lëshuar 128 raketa mbrojtëse ajrore. Ky numër është katër herë më i lartë se ai i fregatave aktuale australiane. Këto qeliza janë gjithashtu të afta të lëshojnë raketa lundrimi Tomahawk me rreze të gjatë.

Anijet janë të vlerësuara për dizajnin e tyre të fshehtë (stealth) dhe teknologjinë e softuerit, duke përfshirë sisteme superiore të sonarëve për të zbuluar nëndetëset armike, shkruan CNN.

Një anije Mogami kërkon vetëm një ekuipazh prej 30 personash, krahasuar me 170 persona për fregatat e vjetra australiane. Kjo është një avantazh i rëndësishëm për vendet me sfida në rekrutimin ushtarak.

Ndikimi gjeopolitik dhe industrial

Kjo marrëveshje është një hap i madh për bashkëpunimin e mbrojtjes mes Japonisë dhe Australisë, të cilët janë të dy anëtarë të aleancës Quad, bashkë me SHBA-në dhe Indinë. Ajo vjen në një kohë kur Australia po përballet me tensionet në rritje me Kinën.

Për Japoninë, kjo shitje shënon një kthim në tregun global të armëve, pas një ndalimi të gjatë pas Luftës së Dytë Botërore. Eksportimi i teknologjisë dhe ndërtimi i anijeve luftarake e katapulton Japoninë në hapësirën e eksportuesve të mëdhenj të mbrojtjes.

Analistët theksojnë gjithashtu se ky veprim nxjerr në pah efikasitetin dhe cilësinë e kantierëve japonezë, duke vënë në dyshim aftësinë e Shteteve të Bashkuara për të ndërtuar fregata të reja në kohë dhe brenda buxhetit. Fregatat e klasit Constellation të Marinës Amerikane janë prapa afatit, dhe disa analistë besojnë se fregatat Mogami janë superiore.

Ky investim thelbësor nga Australia, si pjesë e një projekti më të gjerë mbrojtës, synon të forcojë sigurinë e saj rajonale dhe të ketë një forcë detare më të madhe dhe më të aftë për të përballuar sfidat e ardhshme.

/rtsh.al/