Një vatër e re zjarri ka shpërthyer në zonën pyjore në hyrje të fshatit Picar, duke krijuar rrezik të drejtpërdrejtë për zonën e banuar dhe shtëpitë e banorëve vendas.

Sipas njoftimit zyrtar nga shërbimi zjarrfikës, me mbërritjen e dy grupeve të para në vendngjarje është konstatuar se vatra e zjarrit ndodhet “në një terren të vështirë për ndërhyrje, për shkak të dendësisë së shkurreve dhe pyllit”. Ky terren i thyer po vështirëson manovrimin e forcave operacionale.

Situata mbetet shqetësuese për shkak të afërsisë së flakëve me fshatin Picar dhe rrezikut real të përhapjes së mëtejshme. Për këtë arsye, autoritetet kanë përforcuar praninë e tyre në terren.

Zyrtarët e shërbimit zjarrfikës bënë me dije se “aktualisht, në aksion ndodhen dy grupe të shërbimit zjarrfikës, ndërsa po mbërrin edhe grupi i tretë, me qëllim vënien sa më shpejt të situatës nën kontroll”.

Operacioni i fikjes së zjarrit po vijon me intensitet nga forcat operacionale, ndërsa institucionet konfirmojnë se “prioriteti kryesor i ndërhyrjes është mbrojtja e fshatit Picar dhe banorëve të tij nga përhapja e flakëve”.

/rtsh.al/