Qeveria ka vendosur mbylljen e plotë të ndërmarrjes shtetërore “Kantieri i ndërtimit dhe riparimit të anijeve” (KNRA), me seli në bazën detare të Pashalimanit në Orikum, Vlorë.

Vendimi i miratuar me propozim të ministrit të Mbrojtjes shfuqizon aktin e vitit 2015 që krijoi këtë ndërmarrje, duke rikthyer të gjithë infrastrukturën dhe burimet njerëzore nën varësinë e drejtpërdrejtë ushtarake.

Kalimi i pasurive dhe punonjësve te Forca Detare

Sipas vendimit zyrtar, pesë pasuritë paluajtshme të ndërmarrjes (me numra kadastralë nga 150/22 deri në 150/26) në Pashaliman i kalojnë automatikisht në përgjegjësi administrimi Ministrisë së Mbrojtjes, posaçërisht për nevojat e Komandës së Forcës Detare.

Në të njëjtën kohë, të gjithë punonjësit ekzistues dhe asetet e tjera logjistike të kantierit do të transferohen plotësisht brenda strukturave ushtarake të ushtrisë.

“Punonjësit dhe asetet e ndërmarrjes shtetërore ‘Kantieri i ndërtimit dhe riparimit të anijeve’, pas mbylljes, transferohen në strukturën e Komandës së Forcës Detare.”, citohet nga vendimi i qeverisë.

Procesi i dorëzimit dhe inventarizimit të pronave do të kryhet përmes një komisioni të përbashkët me përfaqësues nga Forca Detare dhe vetë ndërmarrja që po mbyllet.

Mbulimi i borxheve nga buxheti i Mbrojtjes

Mbyllja e ndërmarrjes do të shoqërohet edhe me shlyerjen e detyrimeve financiare që ajo kishte akumuluar deri në hyrjen në fuqi të këtij vendimi. Borxhi total i llogaritur kap shifrën e 69 640 394 lekëve.

Të gjitha efektet financiare për shlyerjen e këtyre detyrimeve do të përballohen drejtpërdrejt nga buxheti i Ministrisë së Mbrojtjes, brenda programit buxhetor “Forcat e luftimit”.

Për zbatimin e këtij vendimi janë ngarkuar Ministria e Mbrojtjes, Komanda e Forcës Detare dhe vetë drejtuesit e ndërmarrjes shtetërore në proces mbylljeje.

/rtsh.al/