Pavarësisht valës së të nxehtit të kësaj vere, Qarku Lezhë është përballur me më pak zjarre krahasuar me vitet e mëparshme. Sipas të dhënave të Mbrojtjes Civile, gjatë muajve qershor dhe korrik janë regjistruar 28 raste zjarresh, kryesisht në zona pyjore, kullota dhe toka të papunuara.

Në tre raste është kërkuar ndërhyrja nga ajri me helikopter, ndërsa operacionet janë mbështetur edhe nga forcat e ushtrisë.

“Vlen të theksohet se gjatë muajit korrik jemi mbështetur në tre raste nga Agjencia Kombëtare e Mbrojtjes Civile, në bashkëpunim me Ministrinë e Mbrojtjes. Nëpërmjet Agjencisë Kombëtare të Mbrojtjes Civile janë angazhuar mjete ajrore në një rast në Kurbin dhe në dy raste në Lezhë, përkatësisht në Shëngjin dhe në Grykën e Manatisë. Njëkohësisht, në Shëngjin, në lagjen Skot, në Ishull-Shëngjin, janë angazhuar edhe 46 efektivë të Forcave të Armatosura për fikjen e zjarrit”, u shpreh Nikoll Tushi, Përgjegjës i MC, Prefektura Lezhë.

Me vijimin e temperaturave të larta edhe gjatë muajit gusht, strukturat e Mbrojtjes Civile në të tre bashkitë e Qarkut ne fjale, Lezhë, Kurbin dhe Mirditë, vijojnë të jenë në gatishmëri të plotë.

Monitorimi i territorit mbetet i pandërprerë, ndërsa banorëve u kërkohet të tregojnë kujdes maksimal dhe të shmangin veprimet që mund të shkaktojnë zjarre, veçanërisht në zonat pyjore dhe ato me bimësi të thatë.

/rtsh.al/