Kryetari i Partisë së Lirisë, Ilir Meta, ka ftuar të rinjtë që të bashkohen me opozitën për të larguar “qeverinë grabitëse nga pushteti”. Meta, gjatë fjalës në mbledhjen e Komitetit Drejtues Kombëtar të PL-së, theksoi se opozita do ta çmontojë modelin e Rilindjes, që zhyti shqiptarët në varfëri, që marrin borxhe dhe që nuk lajnë dot as borxhet.

 “Arsimi do të jetë kryeprioriteti ynë. Në çdo vendim që do të merret në të ardhmen, i pari do të jetë për të plotësuar kërkesat më të domosdoshme të këtij sektori jetik. Më 12 nëntor qytetarët të thonë fjalën e tyre. Të jenë të gjithë së bashku për të dhënë mesazhin se koha e arbitraritetit dhe nëpërkëmbjes së të drejtave të shqiptarëve, që nga vogëlushët deri te më të moshuarit, ka marrë fund. I ftojmë të gjithë të rinjtë të bashkohen me moton për të larguar këtë qeveri grabitëse. Shqipëria do t’i përkasë të rinjve. Mbrëmjen e 14 majit jam i sigurt që do të jeni të gjithë për të fituar rikthimin e demokracisë”,- tha Meta.

/rtsh.al/