Operacionet e kërkim-shpëtimit vijojnë në brigjet e Kyrenias së pushtuar, pas fundosjes së katamaranit të pasagjerëve “Filo Jet”, ku tetë persona kanë humbur jetën dhe të paktën 17 të tjerë rezultojnë ende të zhdukur. Autoritetet po përpiqen të rindërtojnë minutë pas minute ngjarjet që çuan në fundosjen e anijes, duke mbledhur dëshmitë e të mbijetuarve dhe duke hetuar veprimet e ekuipazhit, kushtet e nisjes dhe masat e sigurisë të marra para udhëtimit.

Në bordin e “Filo Jet” ndodheshin gjithsej 267 persona, mes tyre 259 pasagjerë dhe tetë anëtarë ekuipazhi. Ndërsa kërkimet për të zhdukurit vazhdojnë, dëshmitë e të mbijetuarve konsiderohen thelbësore për të hedhur dritë mbi shkaqet e tragjedisë dhe momentet dramatike para fundosjes.

Katamarani është fundosur në një thellësi prej rreth 514 metrash, duke e bërë jashtëzakonisht të vështirë qasjen te rrënojat dhe kontrollin e brendësisë së anijes.

Sipas informacioneve të deritanishme, një anije turke e pajisur posaçërisht, së bashku me personel të specializuar, pritet të kontribuojë në operacion. Një nga çështjet kryesore që autoritetet duhet të sqarojnë është nëse ndonjë prej personave të zhdukur ndodhet ende brenda katamaranit.

Vëmendje e veçantë i është kushtuar edhe gjetjes dhe rikuperimit të regjistruesit të të dhënave të anijes, pasi informacioni që ai përmban mund të jetë vendimtar për rindërtimin e minutave të fundit para fundosjes.

Në qendër të hetimit janë dëshmitë e pasagjerëve që arritën të mbijetojnë. Disa prej tyre kanë ngritur akuza serioze lidhur me reagimin e ekuipazhit dhe mënyrën se si u menaxhua situata. Një prej pasagjerëve tha se që në minutat e para të udhëtimit anija po përballej me goditje të forta nga dallgët dhe se pasagjerët kishin vënë re hyrjen e ujit në kabinë. Sipas dëshmisë së tij, pasi njoftuan një anëtar të ekuipazhit se kabina po mbushej me ujë, ata morën përgjigjen: “Jemi mësuar me këtë, gjithçka do të jetë mirë.” Të mbijetuar të tjerë përshkruan një situatë kaotike, ndërsa gjendja u përkeqësua me shpejtësi. Një pasagjer që foli për CNN Türk pretendoi se anëtarët e ekuipazhit u evakuuan të parët, ndërsa pasagjerët mbetën brenda anijes pa udhëzime të qarta.

Edhe çështja e jelekëve të shpëtimit është bërë pjesë e hetimit. Një prej pasagjerëve tha se disa pasagjerë u detyruan të hidheshin në det pa pajisje shpëtimi, duke e përshkruar situatën si “një betejë për mbijetesë”. Sipas tij, anija filloi të merrte ujë rreth 20–25 minuta pas nisjes nga Kyrenia, ndërsa nisja ishte vonuar më herët për shkak të erërave të forta. Ai pretendoi gjithashtu se kishte probleme serioze me disponueshmërinë e jelekëve të shpëtimit.

Në kuadër të hetimit, kapiteni dhe shtatë anëtarët e ekuipazhit të “Filo Jet” janë arrestuar. Dëshmitë e tyre pritet të krahasohen me deklaratat e të mbijetuarve, të dhënat teknike të anijes dhe çdo material audiovizual të disponueshëm nga momentet para dhe gjatë fundosjes.

/rtsh.al/