Agjencia Kombëtare e Veterinarisë dhe Mbrojtjes së Bimëve (AKVMB) ka njoftuar sot një zgjerim të hartës së zonave të prekura nga murtaja te bagëtitë e imta në Shqipëri. Kjo sëmundje, e cila është shumë ngjitëse dhe shkatërruese për blegtorinë, po kërkon masa të menjëhershme për frenimin e saj.

Deri më tani, AKVMB ka identifikuar zyrtarisht 7 ferma pozitive në 5 vatra shpërthimi. Në këto ferma, krerët e bagëtive po asgjësohen sipas protokolleve strikte veterinare, një hap kyç për të parandaluar përhapjen e mëtejshme të sëmundjes.

Në përpjekje për të kontrolluar situatën, AKVMB ka marrë një sërë masash urgjente:

1. Ndalimin e tregtimit të kafshëve të gjalla në zonat e prekura.
2. Ndalimin e lëvizjes së kafshëve brenda dhe jashtë këtyre zonave.

Njëkohësisht, Agjencia i ka bërë apel fermerëve që të jenë bashkëpunues dhe të njoftojnë menjëherë veterinerët për çdo shqetësim shëndetësor që paraqesin kafshët në fermat e tyre blegtorale. “Ky është një hap jetik për mbrojtjen e tufave dhe për ndalimin e përhapjes së mëtejshme të kësaj sëmundjeje,” thekson AKVMB.

AKVMB siguron se veterinerët janë në terren, në gatishmëri të plotë, duke punuar ngushtë me fermerët. Ata po marrin mostra për analiza dhe po monitorojnë vazhdimisht gjendjen shëndetësore të kafshëve, me qëllim identifikimin dhe izolimin e shpejtë të rasteve të reja.

Situata mbetet delikate, por AKVMB po bën përpjekje maksimale për të frenuar përhapjen e sëmundjes dhe për të mbrojtur sektorin blegtoral në Shqipëri.

/rtsh.al/