Ministrja e Shëndetësisë, Evis Sala, ka reaguar për ndarjen nga jeta të mjekut neonatolog, pedagogut dhe mentorit, Dr. Edi Tushe, duke e cilësuar atë si një nga personalitetet më të shquara të mjekësisë shqiptare.

Në reagimin e saj, Sala vlerëson kontributin e Dr. Tushes në themelimin dhe zhvillimin e neonatologjisë moderne në Shqipëri, si dhe rolin e tij në formimin profesional të brezave të tërë mjekësh. Ajo thekson se sistemi shëndetësor humbi një figurë që me punën, dijen dhe vizionin e tij ka ndikuar në përmirësimin e jetës së mijëra fëmijëve dhe familjeve shqiptare. Sala e ka cilësuar kujtimin dhe veprën e Dr. Tushes si pjesë të rëndësishme të historisë së mjekësisë shqiptare.

“Trishtim dhe dhimbje për ndarjen nga jeta të Dr. Edi Tushes, mjek neonatolog, pedagog, mentor dhe një prej personaliteteve më të shquara të mjekësisë shqiptare.

Dr. Tushe ishte ndër themeluesit dhe kontribuesit më të rëndësishëm në zhvillimin e neonatologjisë moderne në Shqipëri, duke lënë një trashëgimi të vyer në kujdesin për të porsalindurit dhe në formimin profesional të brezave të tërë mjekësh.

Sot, sistemi ynë shëndetësor humbet një prej njerëzve që me punën, dijen dhe vizionin e tij kontribuoi në përmirësimin e jetës së mijëra fëmijëve dhe familjeve shqiptare.

Në emër të Ministrisë së Shëndetësisë dhe Mirëqenies Sociale, shprehim ngushëllimet më të sinqerta familjes, të afërmve, miqve dhe kolegëve të tij. Kujtimi dhe vepra e Dr. Edi Tushes do të mbeten përherë pjesë e historisë së mjekësisë shqiptare. I përjetshëm qoftë kujtimi i tij!”, shkruan Sala në rrjetin social Facebook.

/rtsh.al/