Një grup nënash të ushtarëve rusë, i’u bashkuan një grupi aktivistësh, për të kërkuar tërheqjen e trupave të Moskës nga Ukraina. Për këtë ato kanë publikuar edhe një peticion në internet.

Aktiviteti, i organizuar nga grupi rus i rezistencës feministe kundër luftës, përkon me Ditën e Nënës në Rusi. Peticioni është publikuar në Change.org dhe i drejtohet parlamentarëve në komisionet përkatëse të Dumës së Shtetit dhe Këshillit të Federatës. Peticioni kishte fillimisht mbi 1,500 nënshkrime dhe me kalimin e orëve numri po rritet.

“Prej nëntë muajsh po vazhdon i ashtuquajturi ‘operacion special ushtarak’, i cili ka sjell shkatërrim, pikëllim, gjak dhe lot”,- thuhet në peticion.

“Gjithçka që ndodh në Ukrainë dhe Rusi shqetëson zemrat tona. Pavarësisht se çfarë kombësie, feje apo statusi shoqëror jemi, ne, nënat e Rusisë, jemi bashkuar nga dëshira: të jetojmë në paqe dhe harmoni, t’i rrisim fëmijët tanë në kushte paqësore dhe të mos kemi frikë për të ardhmen e tyre”.”- vijon peticioni.

Apeli përshkruan nënat e rekrutëve dhe ushtarëve të mobilizuar se janë “të detyruara të trokasin në mënyrë poshtëruese në pragjet e administratave të qytetit”, duke u përpjekur që t’u kthejnë burrat e tyre në shtëpi.

“Ne jemi kundër pjesëmarrjes së djemve, vëllezërve, bashkëshortëve, baballarëve tanë në këtë luftë. Detyra juaj është të mbroni të drejtat dhe liritë e nënave dhe fëmijëve, nuk duhet të mbyllni sytë para gjithë kësaj”, thuhet në peticion. CNN

/rtsh.al/