Prokuroria e Posaçme Kundër Korrupsionit dhe Krimit të Organizuar (SPAK) ka bërë publike detajet e operacionit ndërkombëtar që çoi në arrestimin e shtetasit Ermal Beqiri në Francë. I shpallur në kërkim ndërkombëtar me “Njoftim të Kuq” nga Interpol Tirana, Beqiri akuzohet për një sërë veprash të rënda penale dhe pritet të ekstradohet drejt Shqipërisë, ndërsa i janë zbuluar pasuri me vlerë miliona euro edhe në territorin francez.

Incidenti dhe arrestimi në hapësirën ajrore franceze

Ndalimi i Beqirit në territorin francez erdhi pas një incidenti të pazakontë ajror. Më datë 24 korrik 2026, ai u detyrua të ulej nga autoritetet franceze pas shkeljes së një zone të sigurisë së lartë. Sipas njoftimit zyrtar të zbardhur nga SPAK, arrestimi u krye pasi ai:

“hyri me një avion të lehtë në hapësirën ajrore të kufizuar të centralit bërthamor të Penly-t (Seine-Maritime) dhe u detyrua të ulej në aerodromin e Albert-it (Somme).”

Fillimisht i ndaluar nga Forcat Ajrore dhe të Hapësirës të Francës, çështja e tij iu referua Xhandarmërisë Franceze. Gjatë verifikimeve doli zbuluar se ai ishte nën shënjestrën e drejtësisë shqiptare.

Akuzat dhe hetimet e SPAK

Ermal Beqiri është subjekt i procedimit penal nr. 20/1 të vitit 2025. Ndaj tij, Gjykata e Posaçme e Shkallës së Parë ka caktuar masën e sigurisë “arrest në burg” më 15 dhjetor 2025. Akuzat që rëndojnë mbi të përfshijnë vepra të rënda të lidhura me krimin e organizuar, korrupsionin dhe pastrimin e parave.

SPAK thekson në dosjen e tij se hetimet po zhvillohen për:

“kryerjen e veprave penale “Konkurrenca e paligjshme nëpërmjet dhunës”, “Heqja e paligjshme e lirisë”, “Shkelja e barazisë së pjesëmarrësve në tendera apo ankande publike” e kryer në formën e veçantë të bashkëpunimit atë të grupit të strukturuar kriminal, si dhe “Pastrimi i produkteve të veprës penale.””

Pas caktimit të masës së sigurisë, shpallja e tij në kërkim ndërkombëtar është pasqyruar në databazën e Interpol Tirana më 24 dhjetor 2025.

Zbulimi i pasurive kriminale në Francë

Një aspekt kyç i këtij operacioni ka qenë bashkëpunimi i ngushtë midis SPAK dhe autoriteteve franceze (përfshirë Shërbimin e Sigurisë së Brendshme – SSI, DNPJ dhe OCLCO) për gjurmimin e aseteve financiare të të dyshuarit. Koordinimi i nisur që prej 19 qershorit 2026 çoi në zbulimin e pasurive të paluajtshme luksoze dhe llogarive të majme bankare.

Në lidhje me asetet e identifikuara për sekuestrim, njoftimi konfirmon:

“identifikuan disa asete me origjinë kriminale të ndodhura në Francë, veçanërisht llogari bankar me një vlerë totale prej mbi dy milionë eurosh, dy apartamente, u evidentua blerja e një kështjelle në departamentin e Oise (60) rreth 2.6 milion euro, mjete motorike etj.”

Për këto asete, SPAK i ka dërguar kërkesë për ndihmë juridike autoriteteve franceze me qëllim sekuestrimin e tyre, ndërsa hetimet financiare po thellohen nga Zyra Qendrore për Luftën kundër Krimit të Rëndë Financiar (OCRGDF).

Procedurat e ekstradimit

Gjykata franceze ka urdhëruar vazhdimin e paraburgimit të shtetasit Ermal Beqiri për qëllime ekstradimi. Gjatë operacionit, me kërkesë të SPAK, u kryen gjithashtu kontrolle në ambientet në pronësi të tij në Francë, ku u sekuestruan materiale me interes për procedimin penal.

Nga ana e Prokurorisë së Posaçme, i është përcjellë tashmë Ministrisë së Drejtësisë kërkesa zyrtare, e cila do t’u dërgohet autoriteteve franceze për të finalizuar ekstradimin e tij drejt Republikës së Shqipërisë. SPAK mbylli njoftimin me falënderime për agjencitë partnere ndërkombëtare dhe oficerët e kontaktit që bënë të mundur shkëmbimin e pandërprerë të informacionit, duke mundësuar lokalizimin dhe arrestimin e të shumëkërkuarit.

/rtsh.al/