Policia Kufitare e Rinasit ka goditur 7 raste të paligjshmërisë gjatë kontrolleve të imtësishme në hyrje dhe dalje të Republikës së Shqipërisë.

Në pranga kanë rënë 6 shtetas kinezë dhe një shtetase nga Bjellorusia, ndërsa janë sekuestruar 6 dokumente të falsifikuara dhe një sasi mallrash kontrabandë.

Sipas njoftimit zyrtar, shërbimet e Policisë Kufitare kanë konstatuar 6 raste të tentativës për kalim të kufirit me pasaporta të falsifikuara të shtetit të Hong Kongut.

Pas ekzaminimit në laborator, dokumentet rezultuan false dhe si pasojë u arrestuan në flagrancë shtetasit M. B., 29 vjeç, X. Zh., 66 vjeç, Zh. W., 52 vjeç, H. J., 45 vjeç, W. Zh., 38 vjeç dhe G. H., 43 vjeçe, të gjithë me shtetësi kineze.

Ndërkohë, gjatë kontrolleve në hyrje, shtetasja A. W., 45 vjeçe, me shtetësi bjelloruse, e cila udhëtonte nga Treviso drejt Tiranës, u ndalua pasi dyshohej për qëllimin e udhëtimit.

Gjatë kontrollit fizik dhe të bagazheve, asaj iu gjetën mallra për qëllime estetike (botox dhe fillera), për të cilat kërkohen kushte të veçanta transporti dhe licencë e posaçme, të cilat nuk i dispononte. Për këtë arsye, ajo u arrestua për veprat penale

“Kontrabanda me mallra të ndaluara” dhe “Kontrabanda me mallra të licencuara”.

/rtsh.al/