Papa Françesku ka nisur turin e tij 12-ditor në katër vende në Azinë Juglindore dhe Paqësorin Jugor, që përfshin gjithashtu Papua Guinenë e Re, Timorin Lindor dhe Singaporin.

Mëngjesin e kësaj të martë (3 shtator) Papa Françesku ka mbërritur në Indonezi për vizitën e tij 4-ditore.

Në kuadër të vizitës së Papës, Indonezia ka forcuar sigurinë, me 9,000 policë dhe zyrtarë ushtarakë.

Françesku është Papa i tretë që viziton Indonezinë, e cila ka popullsinë më të madhe të muslimanëve në botë.

Gjatë qëndrimit të tij në Indonezi, ai do të vizitojë xhaminë kryesore të kryeqytetit, do të takohet me presidentin në largim Joko Widodo dhe do të mbajë një meshë për rreth 70,000 njerëz.

Vizita e Françeskut në Indonezi nxjerr në pah interesin e tij për të thelluar dialogun midis komuniteteve të krishtera dhe myslimane.

“Për kohën më të gjatë, ka pasur tensione. Të dy grupet kanë pasur keqkuptime gjatë rrjedhës së historisë,” tha Jonathan Tan, një ekspert i studimeve fetare në Universitetin Case Western Reserve në SHBA.

“Unë mendoj se ajo që Papa dëshiron të bëjë është të bëjë një rrugë të re përpara, një mënyrë të re të lidhjes me njëri-tjetrin, jo një mënyrë mbrojtëse,” tha ai.

Më shumë se 87% e popullsisë së Indonezisë, ose rreth 242 milionë njerëz, janë myslimanë. Katolikët përbëjnë vetëm 3% të popullsisë së vendit.

Ignatius Suharyo, Kryepeshkopi i Xhakartës, tha se Papa Françesku dëshiron të jetojë në përputhje me trashëgiminë e Françeskut të Asizit, shenjtorit të shekullit të 13-të, emrin e të cilit ai miratoi në 2013.

“Françesku i Asizit kaloi fushën e betejës për t’u takuar me një nga udhëheqësit myslimanë atje. Kështu që ai personazh… është diçka që [Papa Françesku] dëshiron të mishërojë dhe të tregojë,” tha Suharyo.

/rtsh.al/