Papunësia vazhdon të jetë dukuri shqetësuese në bashkinë e Delvinës. Shkaqet si dhe pasojat e papunësisë, janë sa sociale, aq edhe të komplikuara e po mbeten të pazgjidhura, duke rënduar drejt e tek të rinjtë dhe indirekt në të ardhmen e këtij qyteti.

Gjatë kohës së pandemisë, pati rritje edhe më, të numrit të personave të pa punë në këtë qytet , pasi disa biznese u mbyllën e po ashtu edhe një sipërmarrje e vogël që punësonte disa punonjës. Banorët janë të mendimit , që ky fenomen të nis e  të largohet pak e nga pak nga Delvina, duhet të fillojnë të çelen sipërmarrje të reja , si fasoneritë e fabrikat.

“Shumica e banorëve janë të papunë.Të rinjtë janë larguar në mërgim. Ka edhe nga ata që janë zhvendosur nëpër qytete të tjerë, pasi mundësia për të gjetur punë në Delvinë, është e vogël. Fabrika nuk ka më, edhe një që ishte u mbyll! Gratë qëndrojnë në shtëpi, pasi nuk kanë ku të venë”, thotë një qytetar.

“Ajo që do të ndikonte në uljen e papunësisë ,është vetëm hapja e fabrikave. Të gjithë banorët e kanë këtë shqetësim, pasi këtu nuk kanë ku të punojnë dhe detyrohen të largohen”, thotë një tjetër banore.

Instituti i statistikave raporton se, në periudhën janar-mars, papunësia rezulton të jetë në nivelin 11.4% në gjithë vendin duke pësuar një zbritje me 0,2% krahasuar me dhjetorin e vitit 2019.

Numri më i madh i personave që kanë humbur punën, është në sektorin e bujqësisë, ndjekur nga industria dhe shërbimet. Ndërkohë në Delvinë edhe pse me pengesa për shkak të pandemisë, të gjithë organet kompetente, po punojnë për afrimin e investitorëve të huaj, me qëllim çeljen e bizneseve të rinj për punësimin e të rinjve, por jo vetëm.