Ky fillim vere ka rritur ndjeshëm fluksin e hyrjeve dhe daljeve edhe përmes pikës kufitare të Qafë Morinës në Tropojë. Pjesa më e madhe e kalimeve në këtë pikë kufiri regjistrohet nga turistët vendas e të huaj, me destinacion Luginën e Valbonës, por edhe lumin e Shalës. Qytetarët e Kosovës, përbejnë edhe numrin më të lartë për shkak të afërsisë gjeografike.

 “Jemi nisur për vizitë të lumi i Shalës”, tha një udhëtar.

Dy çiftet udhëtojnë për herë të parë drejt lumit të Shalës. Kanë dëgjuar përmes publikimeve mediatike dhe rrjeteve sociale.

Por ndryshe nga pika kufitare e Morinit, në të cilën për një periudhë nëntë mujore aplikohet kalimi i kufirit pa kontrolle, siç është përcaktuar në marrëveshjen e përbashkët ndërqeveritare Shqipëri Kosovë, në pikën kufitare të Qafë Morinës nuk aplikohet një regjim i tillë, e sipas qytetarëve që kalojnë përmes saj, nuk duhej të kishte dy standarte në pikat kufitare Shqipëri-Kosovë.

 I njëjti regjim kontrollesh aplikohet edhe në Qafe Prushi të Hasit, Shishtavec të Kukësit etj. Në 24 orët e fundit, në piken kufitare të Qafë Morinës, kanë hyrë rreth 2100 shtetas nga të cilët 1430 shtetas shqiptarë dhe 530 të huaj.

/RTSH/