Polonia ka siguruar kalimin për në fazën tjetër të Kampionatit Europian të moshës deri në 19 vjeç në volejboll për vajza, teksa ka marrë dhe fitoren ndaj Shqipërisë, 3-0 në sallën olimpike “Feti Borova”. Në një ndeshje të dominuar tërësisht nga polaket, Shqipëria nuk ka mundur të bëjë dot asgjë. Diferencat janë të mëdha në fushën e lojës, ndërsa Polonia ka rrëmbyer dy sete njëherazi, 25-7. Ka një farë reagimi nga vajzat tona në setin e tretë, por që gjithsesi përsëri gjërat janë për Poloninë, 25-17.

Në përfundim të ndeshjes ka ardhur për mikrofonin e Radio Televizionit Shqiptar, trajneri i Polonisë, Vieslav Popik: “Për ne është një mision i përmbushur kalimi në fazën tjetër të Kampionatit Europian. Që tani nis puna për një përgatitje më serioze dhe më të gjithanshme me qëllimin vajtjen në finalet e Kampionatit Europian. Në përgjithësi kemi treguar gjëra të mira, ndaj dhe jemi kryesuesit e grupit”.

Ndeshja e radhës do të jetë Shqipëri – Austri, e cila në ora 18:00 do të zhvillohet po në sallën olimpike “Feti Borova” e që do të vijë drejtpërsëdrejti në rrjetin e Radio Televizionit Shqiptar.