Presidenti i KiE, Charles Michel, nëpërmjet një postimi në Twitter, pas përfundimit të Samitit BE- Ballkani Perëndimor,   shprehet se “e ardhmja është më e sigurt dhe e begatë me Ballkanin Perëndimor brenda BE-së”.

“Samiti dhe deklarata e sotme janë piketa të rëndësishme. Ato mbartin angazhime konkrete dhe hapa shtesë drejt integrimit. Unë besoj thellësisht se e ardhmja e fëmijëve tanë do të jetë më e sigurt dhe më e begatë me Ballkanin Perëndimor brenda BE-së.”- shkruan Michel.

Në Samitin e BE- Ballkani Perëndimor të zhvilluar sot në Tiranë, liderët evropianë ranë dakord për sfidat e përbashkëta që kanë vendet anëtare përpara tyre.

Agresioni i Rusisë ndaj Ukrainës, angazhimi i BE-së në perspektivën e anëtarësimit të Ballkanit Perëndimor në familjen evropiane, vijueshmëria e reformave, mbështetja për dialogun Prishtinë- Beograd, paketa e mbështetjes për energjinë, ishin disa nga pikat kryesore të Samitit.

Michel e cilësoi si një ngjarje historike faktin që ky Samit u mbajt në Tiranë dhe kjo, sipas tij, është një mesazh që BE-ja mbetet e angazhuar në Ballkani Perëndimor.

 /rtsh.al/