Ministria e Bujqësisë vjen në Bashkinë e Konispolit me një tjetër projekt madhor “Rehabilitimin dhe modernizimin e skemës ujitëse me burim ujor rezervuarin e Janjarit dhe Mursisë”, me një investim prej 10 milion eurosh.

Ky projekt i rëndësishëm synon ndërtimin e një sistemi të ri ujitjeje me presion, që do t’u shërbejë fermerëve të zonës së Konispolit, duke mbuluar 2,215 ha tokë bujqësore me standarde të reja dhe efikasitet më të lartë.

Fermerët e zonës së Konispolit shprehen se prej vitesh përballen me sfida të mëdha për sigurimin e ujit dhe ky investim do të jetë një kthesë e madhe për punën në bujqësi.

Ky investim përbën fazën e dytë të ndërhyrjeve në këtë zonë, pas projektit të realizuar në periudhën 2016–2020, me vlerë 12.6 milion euro, ku u rehabilitua rezervuari i Janjarit dhe rrjeti kryesor i kanaleve ujitëse, duke garantuar furnizimin për mbi 4,500 ha në bashkitë Finiq dhe Konispol.

Ky investim është më shumë se një projekt infrastrukture është një hap i rëndësishëm drejt modernizimit të bujqësisë në jug të vendit, një garanci për qëndrueshmëri ndaj ndryshimeve klimatike dhe një mbështetje konkrete për fermerët e zonës.

Gazetare: B. Pëllumbi

/rtsh.al/