Në kuadër të realizimit të projektit madhor të gazifikimit të Korçës kanë nisur investigimet gjeoteknike dhe gjeofizike në terren, një fazë e rëndësishme për përgatitjen e infrastrukturës së re dhe avancimin e projektit.

Grupi i punës është duke marrë mostrat e shtresave të tokës në pika të ndryshme të qytetit të Korçës për të nxjerrë një raport gjeologjik mbi gjendjen aktuale, e cili më pas do i jepet firmës zbatuese të projektit të gazifikimit.

“Ky është studimi gjeologjik që po bëhet në të gjithë Korçën për shpërndarjen e gazit, i cili do të shtrihet në të gjithë qytetin.

Ne bëjmë studime gjeologjike për shtresat e tokës dhe bazamentet. Për këto kemi edhe laboratorin e analizave. Marrim mostrat, bëjmë shpime në të gjithë qytetin, marrim mostrat përkatëse dhe kryejmë analizat. Në bazë të rezultateve, përcaktojmë shtresat e tokës dhe kushtet gjeologjike për shtrirjen e tubacionit të gazit në qytet. Pas përfundimit të këtij studimi, vijojnë edhe procedura të tjera, sipas planifikimit dhe procedurave që ka kompania, e cila më pas do të fillojë punimet. Ne përfaqësojmë vetëm pjesën e studimeve gjeologjike. Në përgjithësi, kemi studiuar të gjithë zonën e Korçës”, u shpreh Xhevdet Sadiku, Kryetar i grupit të punës.

Gazifikimi i Korçës është një ndër projektet më të rëndësishme strategjike për të ardhmen e qytetit, që do të sjellë një infrastrukturë energjetike moderne dhe një zgjidhje afatgjatë për ngrohjen e popullatës.

Gazetare Kostanca Koçi

/rtsh.al/