Prokuroria e Tiranës ka dërguar për gjykim dosjen penale ndaj Hazir Maçit, Lejla Maçit, Çerkez Nikoçit, Ardjan Piranit, Alfred Maçit dhe Endrit Nezajt, të akuzuar për organizimin dhe realizimin e kalimeve të paligjshme drejt Shteteve të Bashkuara të Amerikës dhe Kanadasë, kundrejt pagesave që arrinin deri në 35 mijë dollarë për person.

Sipas njoftimit zyrtar, Hazir Maçi, i hetuar edhe më herët për të njëjtën veprimtari kriminale, ka qenë drejtuesi i skemës, të cilën e ka menaxhuar edhe nga ambientet e paraburgimit të Fushë-Krujës, përmes komunikimeve telefonike. Itinerari i ndjekur niste nga Shqipëria, vijonte në disa vende të Europës, më pas drejt Republikës Domenikane dhe, me dokumente të falsifikuara, drejt Kanadasë ose SHBA-ve, përmes Porto Rikos.

Lejla Maçi, bashkëshortja e tij, shoqëronte personat që kishin paguar për udhëtimin e paligjshëm, ndërsa Ardjan Pirani, vëllai i saj, merrej me porositë përmes linjave të transportit Tropojë–Tiranë. Endrit Nezaj, i punësuar në një agjenci turistike, ka ndihmuar duke siguruar dokumente model, ndërsa Çerkez Nikoçi akuzohet për transportin e dokumenteve të falsifikuara. Alfred Maçi dyshohet se ka vënë në dispozicion pasaportën e tij britanike për prodhimin e dokumenteve false.

Tre prej të akuzuarve u arrestuan më 11 shtator 2025, ndërsa ndaj të gjithë personave rëndojnë akuza për falsifikim dokumentesh dhe ndihmë për kalim të paligjshëm të kufijve.

Gazetare: Lusi Përgjegji

/rtsh.al/