Kryeministri Edi Rama ka lavdëruar publikisht dy efektivë policie për aktet e tyre heroike, duke përdorur rastet e tyre si shembuj pozitivë për të gjithë Policinë e Shtetit.

Në një postim në Instagram, Rama vlerësoi Agim Trocin, i cili u plagos rëndë gjatë shuarjes së një zjarri në Sarandë, dhe Klajdi Mustajn, i cili shpëtoi tre udhëtarë nga një makinë që mori flakë në ecje në aksin Levan-Fier.

Kreu i qeverisë theksoi se pavarësisht rasteve të izoluara kur punonjës policie “turpërojnë uniformën”, Policia e Shtetit përfaqësohet në të vërtetë nga mijëra burra e gra që punojnë me përkushtim. Ai theksoi se aktet e dy efektivëve dëshmojnë për guximin dhe humanizmin e forcave të rendit.

“I jemi të gjithë mirënjohës [Klajdi Mustaj] për forcën e madhe të shembullit në shpëtimin e tre qytetarëve,” shkroi Rama, duke theksuar se vetë polici pësoi dëmtime me djegie në duar gjatë operacionit të shpëtimit. Postimi i kryeministrit shoqërohej edhe me pamje të momentit kur Mustaj largonte të plagosurit nga vendi i aksidentit.

Inspektori Klajdi Mustaj nderohet për shpëtimin e tre qytetarëve nga zjarri

Inspektori i Policisë Rrugore, Klajdi Mustaj, është nderuar me “Certifikatë për Shërbime të Dalluara” nga Drejtori i Policisë së Shtetit, Ilir Proda, pas aktit të tij heroik. Mustaj arriti të shpëtojë jetën e tre personave të plagosur në një aksident në aksin Levan-Fier, duke i nxjerrë me shpejtësi nga një automjet që rrezikonte të shpërthente në flakë.

Në reagimin e tij, Drejtori Proda vlerësoi lart guximin dhe profesionalizmin e efektivit.

“Veprimi i Inspektor Klajdi Mustaj tregon më së miri misionin e Policisë së Shtetit: të jemi aty ku qytetarët kanë më shumë nevojë për ne,” tha Proda, duke shtuar se ky akt është një shembull frymëzues për të gjithë trupën policore.

Aksidenti tragjik ndodhi dje, kur një automjet tip “Benz” doli nga rruga dhe u përmbys në vendin e quajtur “Qafa e Koshovicës”. Klajdi Mustaj ndërhyri menjëherë, duke nxjerrë personat e plagosur dhe duke i larguar në një zonë të sigurt. Aktualisht, personat e plagosur ndodhen në spital, ku po marrin trajtimin e nevojshëm mjekësor.

/rtsh.al/