Siguria juridike e pronës dhe ndikimi i saj i drejtpërdrejtë në përmirësimin e klimës së biznesit ishin në qendër të mbledhjes së radhës të Këshillit të Investimeve. Gjatë takimit të drejtuar nga Ministrja e Ekonomisë dhe Inovacionit, Delina Ibrahimaj, u theksua se zgjidhja e çështjeve të pronësisë mbetet një mekanizëm jetik që nxit drejtpërdrejt sektorët strategjikë si bujqësia, agrobiznesi, turizmi dhe ndërtimi.

Gjatë fjalës së saj, ministrja bëri një bilanc të transformimit të administratës publike, duke nënvizuar se aktualisht mbi 95% e shërbimeve ofrohen online. Megjithatë, ajo theksoi se digjitalizimi po shoqërohet paralelisht me një nismë të thellë të deregulimit dhe lehtësimit të procedurave për sipërmarrjen.

Për të garantuar efikasitetin e kësaj reforme, qeveria ka vendosur një standard të ri për vendimmarrjen:

“Këto procese janë të vazhdueshme dhe kërkojnë vëmendje të përhershme, ndaj është vendosur që çdo akt që kalon në Këshillin e Ministrave të shoqërohet me një analizë të qartë mbi ndikimin që ka në rregullimin, mbirregullimin apo deregulimin e shërbimeve,” deklaroi znj. Ibrahimaj.

Pavarësisht progresit të shënuar në regjistrimin e pronave dhe modernizimin e shërbimeve të Kadastrës, u pranua se sfidat mbeten të pranishme. Reformat e reja ligjore, të integruara me Agjendën e Rritjes, do të synojnë rritjen e transparencës dhe ndërtimin e një sistemi funksional e të besueshëm në praktikë.

Riorganizimi institucional i këshillave të biznesit

Një tjetër zhvillim i rëndësishëm i bërë i ditur gjatë mbledhjes është plani për riorganizimin e strukturave konsultative mes shtetit dhe sipërmarrjes. Për të forcuar qëndrueshmërinë institucionale, po shqyrtohet mundësia e bashkimit të disa këshillave të biznesit në një strukturë të vetme të përbashkët.

Ky riorganizim synon rritjen e efektivitetit dhe koordinimit të përbashkët në hartimin e politikave ekonomike; forcimin e kapaciteteve analitike dhe pavarësisë afatgjatë të strukturës së re; ndjekjen rigoroze të zbatimit në praktikë të rekomandimeve të dhëna nga komuniteti i biznesit.

Në përmbyllje, ministrja Ibrahimaj ritheksoi se çdo reformë, veçanërisht ajo e pronës, ka vlerë vetëm kur përkthehet në rezultate konkrete që forcojnë besimin e qytetarëve dhe biznesit. Mbledhja vijoi më pas me një diskutim të hapur dhe shkëmbim propozimesh mes anëtarëve të Këshillit të Investimeve dhe përfaqësuesve të sektorit privat.

/rtsh.al/