Kalaja Rozafa, objekti kryesor turistik në qytetin e Shkodrës vazhdon të ketë një numër të lartë vizitorësh edhe në muajin tetor. Vizitorët mund të shijojnë arkitekturën, muret mbrojtëse dhe panoramën e bukur që ofron nga lartësia. Këtë të Premte kalaja ishte e mbushur me vizitorët e shumtë, shumica të huaj të cilët e vlerësojnë këtë monument historik.

“Jam nga Kroacia, kam ardhur guidë me një grup turistësh francez. Nuk është hera e parë që un vij në Shkodër, por hera e parë që vizitoj kalanë dhe me të vërtetë qënka shum bukur. Shkodra është qyteti im i preferuar, impresionues”, u shpreh një turist.

“Unë vij nga Izraeli, sa kemi mbërritur në Shkodër dhe vizituam kalanë, shumë bukur, hera e parë që vizitojmë Shqipërinë”, një turist tjetër.

“Edhe unë jam nga Izraeli, kemi ardhur sot direkt në Shkodër, pamja që të ofroj kalaja nga lart qenka shumë këndshëm”, u shpreh një turist.

Nuk munguan as nxënësit e gjimnazeve nga qytetet të Shqipërisë që kishin ardhur ekskursion me shkollat.

Kalaja e Rozafës është një nga monumentet më të njohura historike në Shqipëri. Kjo kala ka një histori të lashtë që shkon deri në periudhat ilire e romake.

Gazetar: Mirsad Rakaj

/RTSH/