Kryeministri Edi Rama është pritur nga Presidenti i Malit të Zi, Jakov Milatović, në kuadër të Samitit BE–Ballkani Perëndimor që po zhvillohet në Tivat.

Samiti ka në fokus temën “Prosperiteti dhe Stabiliteti i Përbashkët i BE-së dhe Ballkanit Perëndimor”, duke mbledhur liderët e vendeve të rajonit dhe përfaqësues të lartë të Bashkimit Evropian.

Në takim marrin pjesë edhe Presidentja e Komisionit Evropian, Ursula von der Leyen, Presidenti i Këshillit Evropian, António Costa, si dhe Kancelari i Gjermanisë, Friedrich Merz.

Në qendër të agjendës janë çështjet e zgjerimit të Bashkimit Evropian, zbatimi i Planit të Rritjes për Ballkanin Perëndimor, si dhe forcimi i bashkëpunimit rajonal.

Samiti zhvillohet gjashtë muaj pas takimit të fundit në Bruksel dhe rikonfirmon partneritetin strategjik mes BE-së dhe vendeve të Ballkanit Perëndimor, si dhe angazhimin e unionit për procesin e zgjerimit.

Gjatë diskutimeve, liderët pritet të fokusohen në ecurinë e negociatave të anëtarësimit, integrimin gradual të vendeve të rajonit në tregun evropian dhe zbatimin e reformave të nevojshme për përafrimin me standardet e BE-së.

/rtsh.al/