SHBA-të dhe Mbretëria e Bashkuar kanë arritur marrëveshje tregtare për të ulur taksat e importit për disa makina dhe metale britanike.

Qeveria e Mbretërisë së Bashkuar thotë se po heq tarifën për etanolin për mallrat amerikane.

“Mbretëria e Bashkuar do të vazhdojë të negociojë me SHBA-në pasi marrëveshja tregtare e djeshme ofroi një “lehtësim të madh“”, tha Ministri i Thesarit Darren Jones.

Ky i fundit theksoi se qeveria ka qenë në gjendje të heqë “tarifat ndëshkuese”, të cilat ai sugjeron se kanë pasur një efekt ndalues ​​në prodhim, duke vënë në rrezik vendet e punës dhe jetesën e njerëzve.

“Njerëzit do të kishin humbur vendet e tyre të punës. Ne i kemi mbrojtur ato vende pune për shkak të kësaj marrëveshjeje tregtare“, shtoi ai.

Dhe, pasi i ka trajtuar këta “sektorë kritikë urgjentë”, Jones thotë se qeveria do të “vazhdojë të negociojë në sektorë të tjerë”.

SHBA pranoi të ulë taksën e importit për makinat, të cilën Trump e kishte rritur me 25% muajin e kaluar, në 10% për 100,000 makina në vit. Tarifat për çelikun dhe aluminin, të cilat Trump i ngriti në fillim të këtij viti në 25%, gjithashtu janë ulur. Në përgjithësi, SHBA tha se marrëveshja do të krijonte një “mundësi” prej 5 miliardë dollarësh (3.8 miliardë £) për eksporte, duke përfshirë 700 milion dollarë në etanol dhe 250 milion dollarë në produkte të tjera bujqësore.

Por, Jones thekson se do të ketë një “mekanizëm vjetor rishikimi në nivelin e kuotave”, që do të thotë se Mbretëria e Bashkuar do të jetë në gjendje të negociojë me SHBA-në për të siguruar që prodhuesit të mund të eksportojnë sipas kërkesës.

/rtsh.al/