Një aksident me pasojë vdekjen ka ndodhur pasditen e sotme lagjen “Liria” në qytetin e Shkodrës. Një mjet i rëndë ka përplasur për vdekje një të moshuar, duke shënuar një tjetër viktimë në rrugët e vendit.

Sipas informacioneve paraprake nga Policia e Shtetit, ngjarja ka ndodhur rreth orës 16:00. Një automjet tip kamion, i cili drejtohej nga shtetasi me iniciale A. P., ka goditur këmbësorin H. B., 78 vjeç.

Pavarësisht ndihmës së parë, goditja ka rezultuar fatale për të moshuarin, i cili ka ndërruar jetë si pasojë e plagëve të marra. Menjëherë pas aksidentit, në vendngjarje kanë mbërritur forcat e rendit dhe grupi hetimor.

Shtetasi A. P., drejtuesi i kamionit, është shoqëruar menjëherë në ambientet e Komisariatit të Policisë Shkodër për t’u marrë në pyetje dhe për kryerjen e procedurave ligjore.

Ekspertët e qarkullimit rrugor po punojnë në terren për të skicuar dinamikën e aksidentit dhe për të përcaktuar shkaqet e plota.

/rtsh.al/