Është shpallur fituesi për ndërtimin e aksit rrugor Milot–Balldren, një projekt i rëndësishëm infrastrukturor që konsiderohet pjesë e Korridorit Adriatiko-Jonian dhe që pritet të ndikojë ndjeshëm në lehtësimin e qarkullimit në zonën veriore të vendit.

Lajmin e bëri të ditur Ministri i Infrastrukturës dhe Energjisë, Enea Karakaçi, i cili theksoi se ky aks shërben si një lidhje e rëndësishme mes veriut dhe pjesëve të tjera të Shqipërisë.

Sipas tij, procedura e prokurimit ka qenë komplekse, për shkak të disa tentativave të mëparshme të pasuksesshme, por tashmë është përmbyllur me shpalljen e fituesit që do të realizojë projektin.

“Kemi shpallur fituesin për rrugën Milot–Balldren. Ky është një aks i rëndësishëm, pjesë e Korridorit Adriatiko-Jonian dhe shërben si lidhje e zonës së veriut me pjesët e tjera të Shqipërisë. Kjo është një rrugë e shumëpritur për lehtësimin e trafikut në këtë zonë. Procedura ka qenë jo e lehtë, pasi ka pasur disa tentativa të mëparshme që nuk kanë rezultuar të suksesshme. Sot kemi fituesin që do të bëjë të mundur ndërtimin e kësaj vepre”, tha Karakaçi.

Karakaçi bëri të ditur se ndërtimi i rrugës do të nisë sa më shpejt dhe brenda afateve të përcaktuara në kontratë, duke e cilësuar atë si një nga projektet kyçe për përmirësimin e infrastrukturës në veri të vendit.

Aksi Milot–Balldren është pjesë e Korridori Adriatiko-Jonian, i cili synon të rrisë lidhshmërinë dhe të lehtësojë lëvizjen e mjeteve në rajon.

“Ndërtimi i saj do të fillojë sa më shpejt dhe brenda afateve të përcaktuara në kontratë. Kjo është pjesë e projekteve të tjera infrastrukturore që qeveria do të kryejë në zonën veriore të Shqipërisë”, tha ministri.

/rtsh.al/