Këshilli i Ministrave ka miratuar krijimin e një prej zonave më të mëdha të teknologjisë dhe zhvillimit ekonomik në jug të vendit, të emërtuar “VLORË TEDA/RAMS FREE ZONE”.

Zona e re ekonomike, e cila shtrihet në një sipërfaqe prej 885,557.6 m² (rreth 88.5 hektarë) në zonat kadastrale 8604 dhe 2765 të Bashkisë Vlorë, synon të kthehet në një nyje kyçe industriale dhe teknologjike për rajonin.

Inteligjencë artificiale dhe energji e rinovueshme

Vendimi i qeverisë përcakton qartë kategoritë e veprimtarive që do të lejohen të ushtrohen brenda territorit të përcaktuar të zonës së lirë. Fokus kryesor do t’i jepet teknologjisë së lartë dhe përpunimit jondotës.

Profilet kryesore të lejuara do të jenë:

Ekosistem industrial, logjistik dhe inovativ

Teknologji industriale, automatizim dhe Inteligjencë Artificiale (IA)

Energji e rinovueshme dhe përpunim i lehtë mekanik i metaleve me trajtime sipërfaqësore të pastra.

“Veprimtaritë që do të zhvillohen përfshijnë ekosistemin industrial logjistik, teknologjinë industriale, automatizimin, inteligjencën artificiale dhe energjinë e rinovueshme.”, theksohet në vendim.

Afati 35-vjeçar, kontrata 1 euro dhe zhvilluesi

Në mbështetje të statusit “Investim/investitor, procedurë e veçantë” të dhënë nga Komiteti i Investimeve Strategjike, zhvillues i zonës është shpallur shoqëria “RAMS ALBANIA” sh.p.k. përmes një procedure jokonkurruese.

Përmes këtij vendimi të ri, Këshilli i Ministrave ka shfuqizuar zyrtarisht vendimet e vjetra të vitit 2008 që i kishin dhënë statusin e zonës ekonomike dhe kontratën e formës BOT shoqërisë “Idea Vlora” sh.a. Kjo lëvizje i hap rrugë përfundimisht transformimit të kësaj hapësire pa ngarkesa juridike të së kaluarës.

Për zbatimin e këtij vendimi janë ngarkuar Ministria e Ekonomisë dhe Inovacionit, Agjencia Shqiptare e Zhvillimit të Investimeve (AIDA) dhe Agjencia Shtetërore e Kadastrës (ASHK).

/rtsh.al/