Ministri i Turizmit, Kulturës dhe Sporteve, Blendi Gonxhja, ka bërë publike shifrat e vizitorëve të huaj për muajin maj 2026, duke konfirmuar vijimin e trendit pozitiv të turizmit në Shqipëri.

Sipas të dhënave zyrtare, gjatë muajit maj 2026, Shqipëria mirëpriti 1,143,595 vizitorë të huaj, duke shënuar një rritje prej 16% krahasuar me majin e vitit 2025.

Ministri thekson se kjo ecuri pozitive pasqyron besimin në rritje ndaj Shqipërisë si destinacion turistik, investimet publike dhe private në infrastrukturën turistike, zgjerimin e kapaciteteve akomoduese, promovimin e vazhdueshëm ndërkombëtar dhe kalendarin gjithnjë e më të pasur të aktiviteteve gjatë gjithë vitit.

Në renditjen e tregjeve me rritjen më të lartë të vizitorëve, kryeson Lituania me një rritje spektakolare prej 273%, e ndjekur nga Danimarka me 253%, ndërsa rritje të forta janë regjistruar edhe nga Finlanda (+83%), Polonia (+80%) dhe Irlanda (+63%).

Nga ana tjetër, Kosova mbetet tregu kryesor burimor me 321,714 vizitorë, ndërsa Italia renditet e dyta me 120,344 vizitorë, duke dhënë kontributin më të madh në numrin total të turistëve të huaj që vizituan vendin gjatë muajit maj.

Rritja e vizitorëve sipas shteteve të origjinës:

• Lituania: +273%
• Danimarka: +253%
• Finlanda: +83%
• Polonia: +80%
• Irlanda: +63%
• Izraeli: +48%
• SHBA: +37%
• Kanadaja: +37%
• Mbretëria e Bashkuar: +32%
• Suedia: +26%
• Republika Çeke: +25%
• Belgjika: +24%
• Italia: +24%
• Franca: +21%
• Portugalia: +19%
• Kosova: +15%

Sipas ministrit Gonxhja, rritja e interesit nga tregje të rëndësishme evropiane dhe ndërkontinentale, përfshirë SHBA-në, Kanadanë dhe Mbretërinë e Bashkuar, konfirmon atraktivitetin në rritje të Shqipërisë për turistët që kërkojnë natyrë, kulturë, eksperienca autentike dhe mikpritje.

/rtsh.al/