Kryetari i Delegacionit të Përhershëm të Kuvendit të Shqipërisë në Asamblenë Parlamentare të NATO-s, Igli Hasani, zhvilloi një vizitë zyrtare treditore në Otava, Kanada. Ky aktivitet u organizua nga Asambleja Parlamentare e NATO-s në bashkëpunim të ngushtë me Parlamentin e Kanadasë.

Gjatë kësaj vizite të ngjeshur, Hasani zhvilloi një sërë takimesh me parlamentarë kanadezë, përfaqësues të lartë të institucioneve shtetërore dhe ekspertë të fushës së sigurisë.

Në qendër të diskutimeve të përbashkëta ishin zhvillimet më të fundit gjeopolitike në hapësirën euroatlantike, ku vëmendje e veçantë iu kushtua vazhdimësisë së mbështetjes për Ukrainën, përballjes me sfidat hibride e kibernetike, si dhe rëndësisë gjithnjë e më strategjike që rajoni i Arktikut po merr për sigurinë globale të Aleancës.

Kjo vizitë shërbeu si një platformë e rëndësishme për forcimin e bashkëpunimit ndërparlamentar ndërmjet vendeve aleate dhe për koordinimin e qëndrimeve mbi prioritetet kryesore të NATO-s. Përmes këtij angazhimi, u rikonfirmua edhe një herë pozicioni i palëkundur dhe angazhimi aktiv i Shqipërisë në mbështetje të sigurisë dhe stabilitetit euroatlantik.

/rtsh.al/