Të paktën 10 persona, përfshirë fëmijë, janë vrarë në një sulm me raketa në një fushë futbolli në Lartësitë Golan të pushtuara nga Izraeli, sipas një zyrtari izraelit të shpëtimit, njofton Sky News.

Ushtria izraelite tha se të gjithë të vrarët në fshatin Druze të Majdal Shams ishin të moshës nga 10 deri në 20 vjeç.

Sulmi në fushën e futbollit pasoi një sulm izraelit në Liban që vrau katër militantë të shtunën. Dy Burime të sigurisë në Liban thanë se katër luftëtarët e vrarë në sulmin izraelit në Kfarkila në Libanin jugor ishin anëtarë të grupeve të ndryshme të armatosura, ku të paktën njëri prej tyre i përkiste Hezbollahut.

Forcat e Mbrojtjes së Izraelit (IDF) thanë se avioni i saj kishte shënjestruar një strukturë ushtarake që i përkiste Hezbollahut, pasi identifikuan një celulë militante që hynte në ndërtesë.

Hezbollahu mori përsipër të paktën katër sulme, duke përfshirë raketat Katyusha, si hakmarrje për sulmet në Kfarkila.

Megjithatë, përfaqësuesi i lartë i mediave të Hezbollahut, Mohammad Afif, mohoi përgjegjësinë për sulmin ndaj Majdal Shams.

IDF pretendon se sipas “vlerësimit të situatës dhe inteligjencës”, Hezbollahu ishte prapa sulmit me raketa.

Një zëdhënës i ushtrisë izraelite tha: “Ne po përgatisim një përgjigje kundër Hezbollahut”.

Sulmi, i cili është sulmi më vdekjeprurës ndaj një objektivi izraelit që nga shpërthimi i luftimeve në tetor, ngre frikën për një përshkallëzim më të gjerë në rajon.

/ rtsh.al /