Një ngjarje e rëndë ka tronditur qytetin bregdetar të Sarandës mbrëmjen e sotme. Rreth orës 21:15, në lagjen nr. 4, një 50-vjeçar i identifikuar me inicialet Th. R. është plagosur me armë zjarri në rrethana ende të paqarta.

Atentati ka ndodhur pikërisht përpara biznesit në pronësi të viktimës. Menjëherë pas ngjarjes, 50-vjeçari është transportuar me urgjencë drejt spitalit, ku ndodhet nën kujdesin e mjekëve duke marrë ndihmën e nevojshme mjekësore.

Forcat e Policisë kanë mbërritur menjëherë në vendngjarje dhe kanë rrethuar zonën. Aktualisht po vijojnë kontrolle intensive dhe krehje e territorit për të bërë të mundur identifikimin dhe kapjen e personave të përfshirë.

Nga të dhënat e para të grumbulluara nga dëshmitarët dhe këqyrja paraprake, dyshohet se autorët kanë qenë dy persona të cilët mbanin skafandra në kokë për të fshehur identitetin. Ata janë larguar me shpejtësi nga skena e krimit me një motomjet.

Ndërkohë, grupi hetimor, nën drejtimin e Prokurorisë, po kryen të gjitha veprimet e nevojshme procedurale në vendngjarje, duke sekuestruar prova materiale dhe dëshmi me qëllim zbardhjen e plotë të rrethanave të këtij atentati.

/rtsh.al/