Këshilli i Sigurimit i Kombeve të Bashkuara  ka dënuar në termat më të fortë sulmet e Houthive kundër Arabisë Saudite, duke përfshirë goditjet mbi infrastrukturën civile dhe energjetike.

Në një deklaratë, Këshilli kërkoi që Houthitë “të ndalojnë menjëherë eskalimin e tyre ushtarak”.

Anëtarët e Këshillit përsëritën dënimin e tyre të mëparshëm ndaj sulmeve dhe kërcënimeve kundër anijeve në Detin e Kuq dhe Bab el-Mandeb.

KSKB shprehu solidaritet me Arabinë Saudite dhe afirmoi të drejtën e saj të qenësishme për vetëmbrojtje sipas së drejtës ndërkombëtare.

Organi i OKB-së riafirmoi gjithashtu angazhimin e tij për unitetin, sovranitetin, pavarësinë dhe integritetin territorial të Jemenit.

Gjithashtu, edhe Delegacioni i Bashkimit Evropian në Arabinë Saudite, Bahrein dhe Oman dënoi sulmet e Houthive në një postim në X, duke deklaruar se ato janë “të papranueshme dhe minojnë ekonominë globale”.

Delegacioni, me seli në Rijad, zbuloi gjithashtu se ka qenë në kontakt me princin Faisal bin Farhan Al Saud, ministrin e Jashtëm të Arabisë Saudite, lidhur me ndalimin e luftimeve në Jemen dhe rivendosjen e lirisë së lundrimit në Ngushticën e Hormuzit.

/rtsh.al/