Liqeni i Kukësit vijon të mbetet një vatër masive ndotjeje për shkak të pranisë së tonelatave mbetjeve që mbërrijnë në sipërfaqen e tij menjëherë pas reshjeve dhe shtimit të prurjeve në lumenjtë që e furnizojnë. Ekspertët e mjedisit e vlerësojnë alarmante këtë situatë.

Oljam Dervishi, inxhinier mjedisi dhe drejtor ekzekutiv i organizatës mjedisore RESU, thotë se kjo gjendje nuk është vetëm në Kukës, por një problem i përhapur në shumë zona të vendit.

“Një pjesë e madhe e lumenjve tanë janë të ndotur po njësoj. Ne kemi punuara me lumenjtë në pjesën qendrore, në basenin e Ishmit, Matit, Bunës dhe Drinit. Kjo është si një “hinkë” për mbetjet që më pas shkarkojnë në det”, tha Dervishi.

Përveç problematikave dhe ndikimit negativ në mjedis, e për rrjedhojë edhe në shëndetin e qytetarëve, pamjet janë shqetësuese edhe për imazhin e vendit, veçanërisht për ata që përballen për herë të parë me një situatë të tillë.

“Mjafton të kalosh dhe të shohësh këtë gjendje është alarmante”, tha Dervishi.

Sipas Dervishit, e gjithë kjo situatë lidhet edhe me vetëdijen qytetare.

“Vjen nga mungesa e ndërgjegjes kolektive dhe gjithsecilit prej nesh. Nëse unë hedh mbeturinat në lum, mendojë se nuk është më problemi im”, tha ai

Bashkia e Kukësit prej ditësh është angazhuar për pastrimin e sipërfaqes dhe vijës liqenore nga këto mbetje, prania e të cilave përsëritet dy deri në tre herë gjatë një viti kalendarik.

/rtsh.al/